ShQO-da saılaýda alǵash ret daýys beretin jastarǵa arnalǵan semınar ótti

ÓSKEMEN. QazAqparat – Shyǵys Qazaqstan oblysynda saılaýda alǵash daýys beretin jastarǵa arnalǵan semınar ótti, dep habarlaıdy QazAqparat tilshisi.

Búgin Óskemen qalasynda «Alǵash daýys beretin jastardyń quqyqtyq saýattylyǵyn arttyrý» atty semınar ótti.

Sharany uıymdastyrýshylar – qalalyq jastar resýrstyq ortalyǵy, «Ulaǵat» jastar qoǵamdyq birlestigi, ShQO Azamattyq Alıansy jáne «Saılaýdy partııalyq emes baıqaý» ortalyǵynyń Shyǵys Qazaqstan oblystyq fılıaly.

Semınarda trener retinde «ShQO Taldaý jáne boljaý ınstıtýty» JShS atqarýshy dırektory Aıaýjan Áshimova men «Jergilikti ózin-ózi basqarýdy damytý ortalyǵy» qoǵamdyq qorynyń dırektory Rýfıt Ahmedzıanov sóz sóıledi.

- Jastardyń quqyqtyq saýatyn arttyryp, quqyqtyq mádenıetin qalyptastyrý – óte mańyzdy másele dep bilemin. Búgingi semınarda alǵash ret daýys beretin jastarmen árbir azamattyń beretin daýysynyń mańyzdylyǵy týraly aıttyq. Oılaǵanymyzdaı, jastardyń kókeıinde júrgen suraq kóp boldy, bárine jaýap berýge tyrystyq. Sebebi, otbasylarda balalarmen bul taqyrypta ata-anasy sóılespeýi múmkin, biraq óskeleń urpaq jergilikti deńgeıde sheshim qabyldaýǵa qoǵamdyq turǵyda qatysýdan bastap, saıası naýqandarda óz oıyn bildirýdiń mańyzy týraly oılanyp, osy protsesske qatysýy kerek. Qoǵamdyq uıymdardyń bul baǵyttaǵy jumysynyń mańyzy zor. Sebebi, saılaý úderisin 20 jylǵa jýyq ýaqyt baqylap, qatysyp júrgen maman retinde aıtarymyz bar, sózimiz dáıekti, - deıdi Aıaýjan Áshimova.