ShQO-da saılaý kúni 45 bala dúnıege keldi

SEMEI. QazAqparat – Shyǵys Qazaqstan oblysynda saılaý kúni 45 bala jaryq dúnıe esigin ashty, dep habarlaıdy QazAqparat tilshisi.

Shyǵysqazaqstandyq 45 otbasy kezekti Parlamenttik saılaý kúninde sábıli boldy. Aıgúl Meırambaevanyń otbasy endi jyl saıyn 10 qańtardy erekshe atap ótedi. Aıgúlge daýys berý múmkindigi perzenthanada berildi.

«Bul búkil el úshin mańyzdy saıası shara. Biz jergilikti máslıhattar men Májilis depýtattaryn saılap otyrmyz. Bıyl men ózimniń saılaý quqyǵymdy Ana men bala ortalyǵynda paıdalandym. Osy aıtýly kúnde ulymyz dúnıege keldi. Salmaǵy – 3,4 keli. Óz tańdaýymyzdy jasaýǵa múmkindik bergeni úshin alǵysymyzdy bildiremiz. Biz el bolashaǵy úshin daýys berdik, - deıdi ana.

Osy kúnde Ana men bala ortalyǵy qabyrǵasynda 210 áıel óz tańdaýlaryn jasady. Olardyń qatarynda tek bosanǵan jáne júkti áıelder ǵana emes, sonymen qatar statsıonarlyq em alyp jatqan bala kútimindegi analar da boldy.

Atalmysh ortalyqtyń dırektory Ermek Omarbekov saılaý quqyǵy barlyǵyna berilgenin aıtty.

«Meniń oıymsha, bul jaqsy yrym. Óıtkeni mundaǵy analar balalarynyń jarqyn bolashaǵy úshin daýys berdi», - dedi ol.

Aıta keteıik, 10 qańtarda ShQO-da 24 qyz jáne 21 ul bala dúnıege keldi.