ShQO-da saılaý komıssııasynyń músheleri 3 kúndik úı karantınine jiberildi

ÓSKEMEN. QazAqparat – Shyǵys Qazaqstan oblysynda saılaý komıssııasynyń músheleri 3 kúndik úı karantınine jiberildi, dep habarlaıdy QazAqparat tilshisi.

ShQO Bas memlekettik sanıtarlyq dárigeri mindetin atqarýshynyń jańa qaýlysy jarııalandy. Onda saılaý komıssııasy músheleriniń 72 saǵattyq úı karantınine oqshaýlanǵany jazylǵan.

«Saılaý komıssııasynyń músheleri 3 kún ótkennen keıin PTR ádisimen COVID-19-ǵa synama tapsyrýy tıis. Oń nátıje bolǵan jaǵdaıda jumystan shettetiledi. Bul rette, oblystyq Densaýlyq saqtaý basqarmasy 72 saǵat ishinde úı karantınindegi saılaý komıssııalarynyń múshelerin medıtsınalyq baqylaýdy qamtamasyz etýi qajet», - delingen qaýlyda.

Sonymen qatar qala jáne aýdan ákimdikteri Qazaqstan Respýblıkasy Parlamenti Májilisiniń jáne máslıhattar depýtattarynyń saılaýy ótkizilgen obektilerde dezınfektsııalaý jumystaryn júrgizýge mindetti.