ShQO-da saıası qýǵyn-súrgin qurbany Qaıym Muhamedhanovtyń rýhyna taǵzym etildi

ÓSKEMEN. QazAqparat – Shyǵys Qazaqstan oblysynda saıası qýǵyn-súrgin qurbany Qaıym Muhamedhanovtyń rýhyna taǵzym etildi, dep habarlaıdy QazAqparat tilshisi.

ShQO boıynsha QAJD qyzmetkerleri saıası qýǵyn-súrgin qurbandaryn eske alý kúnine oraı ǵylym jolynda ter tógip, óz eliniń tarıhy men zııalylaryn dáriptegeni úshin qýǵyn-súrginge tap bolǵan qazaq zııalysy Qaıym Muhamedhanovtyń rýhyna taǵzym etip, eskertkishine gúl shoqtaryn qoıdy.

Eskertkish janyna jınalǵandar Qaıym men onyń ákesi Muhamedhannyń úıine jıi qonaqqa kelgen ult janashyrlary Álıhan Bókeıhan, Ahmet Baıtursynuly, Maǵjan Jumabaev, Mirjaqyp Dýlatuly, Júsipbek Aımaýytov, Muhamedjan Tynyshbaev, Halel Ǵabbasov, Sultanmahmut Toraıǵyrov, Ydyrys Mustambaev, Ámire Qashaýbaev, Isa Baızaqovtardy eske alyp, olardyń ómir joldary týraly syr shertisti.

«Ákesiniń qazaq mádenıetiniń qaıratkerlerin qalyptastyrý jolynda qýǵyn-súrgin kórip, birneshe ret tutqyndalǵany, sońynan «Keńes úkimetine qarsy úgit júrgizgen» degen aıyppen atý jazasyna kesilgeni Qaıymdy eliniń tarıhy men ádebıetin keleshek urpaqqa mura etip qaldyrýǵa oqtalǵan nıetinen bas tarttyra almady. Ákesiniń óliminen keıin ózi de Abaı tvorchestvosyn ǵylymı turǵyda zerttegeni úshin tutqyndalyp, Qaraǵandy lagerine jiberilgen. Stalınniń óliminen keıin ǵana bostandyqqa shyqqan qaıratkerdiń bizge qaldyrǵan asyl murasy baǵasyz», - dedi OV 156/14 túzetý mekemesi tárbıe bóliminiń bastyǵy Rýslan Qamajanov.

Esterińizge sala ketsek, osyǵan deıin 1937 jyly tek Shyǵys Qazaqstan oblysynyń ózinde 1350 adam qamaýǵa alynyp, 300 adam atý jazasyna kesilgenin habarlaǵan edik.