ShQO-da sáýir aıynda 41 dala órti tirkelgen
ÓSKEMEN. QazAqparat – Shyǵys Qazaqstan oblysynda sáýir aıynyń basynan beri 41 dala órti tirkeldi, dep habarlaıdy QazAqparat tilshisi.
ShQO Tótenshe jaǵdaılar departamenti bastyǵynyń mindetin atqarýshy Qanat Ábdilovtiń aıtýynsha, 90% jaǵdaıda orman órtiniń negizgi sebebi – naızaǵaıdan. Bıyl Besqaǵaraı aýdanyndaǵy orman órti 2,2 gektar aýmaqty sharpyǵan bolatyn.
«Sáýir aıynda 41 ret dala órtendi. Tilsiz jaýdy 2 ret jergilikti atqarýshy organdar óz kúshterimen óshirse, qalǵanyn órt sóndirýshiler aýyzdyqtaǵan. Búgingi tańda oblys boıynsha órt sóndirý qyzmetinde jeke quramda 2211 qutqarýshy men 452 tehnıka jumys isteýde. Sondaı-aq 23 erikti órt sóndirý jasaǵy qurylǵan. Olardyń quramynda 2 myńǵa jýyq adam, 214 traktor men 213 tehnıka bar», - dedi Qanat Ábdilov ShQO Aımaqtyq kommýnıkatsııalar qyzmetinde ótken onlaın brıfıng barysynda.
Onyń aıtýynsha, turǵyn úılerde jáne dalada shyqqan órtti jyldam sóndirý úshin órt beketin qurýdyń mańyzy zor. Osy jyly Shyǵys Qazaqstanda mundaı 15 beket ashý josparlanyp otyr.
