ShQO-da sáýir aıynda 23 órt tirkeldi
ÓSKEMEN. QazAqparat –Shyǵys Qazaqstan oblysynda bıylǵy órt qaýpi joǵary kezeń bastalǵaly beri 23 órt tirkeldi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 12 sáýirde óńirde órt qaýpi joǵary kezeń bastalǵan. Sodan beri jalpy aýdany 503 gektardy quraıtyn 23 órt tirkeldi. Budan bólek, ormanda 2 ret qyzyl jalyn shyqqan.
«Órttiń aldyn alý úshin 68 mobıldi top quryldy. Olar 38 márte reıd júrgizip, sonyń nátıjesinde órt qaýipsizdigi erejeleriniń talaptaryn buzǵan 57 adam jaýapqa tartyldy», - dedi oblystyq TJD memlekettik órt-baqylaý basqarmasy basshysynyń mindetin ýaqytsha atqarýshy Serik Amangeldın onlaın formatta ótken baspasóz máslıhatynda.
Tabıǵı órtterdi aýyzdyqtaý úshin jeke quramnan 2211 adam, 452 tehnıka saqadaı saı ázir. Sońǵy 4 jylda jergilikti atqarýshy organdardyń orman sharýashylyqtarynyń órtke qarsy tehnıkamen jáne jabdyqtarmen jasaqtalýy tıisti normalardyń 70 paıyzyna deıin jetkizilgen. Búgingi tańda oblys boıynsha jergilikti atqarýshy organdar esebinde turǵan 85 órt sóndirý beketi bar.
ShQO Tabıǵı resýrstar jáne tabıǵat paıdalanýdy retteý basqarmasy basshysynyń orynbasary Arman Esentaevtyń aıtýynsha, sońǵy 5 jylda oblystyq bıýdjetten orman sharýashylyǵynyń materıaldyq-tehnıkalyq bazasyn nyǵaıtýǵa 1 mlrd teńgege jýyq qarajat bólingen.
