ShQO-da sáýir aıynan beri 2 myńnan astam adamdy kene shaqty
ÓSKEMEN. QazAqparat – Shyǵys Qazaqstan oblysynda sáýir aıynan beri 2 myńnan astam adamdy kene shaqqan, dep habarlaıdy QazAqparat tilshisi.
ShQO Sanıtarlyq-epıdemıologııalyq baqylaý departamenti baspasóz qyzmetiniń málimetine súıensek, sáýir aıynan beri endemııalyq aýmaqtarda 2192 adamdy kene shaqty. Onyń ishinde 30 paıyzǵa jýyǵy – 14 jasqa deıingi balalar.
«Kene shaqqan turǵyndardyń 93%-y kene entsefalıtine qarsy ımmýnoglobýlın aldy. Al qalǵandary medıtsınalyq kómekke tym kesh júginýi, qarsy kórsetilimderiniń bolýyna baılanysty alǵan joq. Olardyń arasynda óz erkimen bas tartqandar da boldy», - delingen habarlamada.
Oblys aýmaǵynda bıyl kene entsefalıtine shaldyqqan 1 adam tirkelip otyr. Óskemen qalasyndaǵy naýqas kene shaqqannan keıin medıtsınalyq kómekke júginbegen.
«Qazirgi ýaqytta medıtsınalyq uıymdarda kene entsefalıtine qarsy ımmýnoglobýlın preparatynyń qory jetkilikti. Osy rette, azamattarǵa tabıǵat aıasynda júrgende saqtyq sharalaryn saqtaý qajettigin eskertemiz. Kenelerden abaı bolyńyzdar», - delingen aqparatta.
