ShQO-da sarbaz tilsiz jaýdan adamdy qutqaryp qaldy
NUR-SULTAN. QazAqparat – Shyǵys Qazaqstan oblysy Abaı aýdanynda Ulttyq ulan sarbazy - efreıtor Rýslan Erkebaev tilsiz jaýdan adamdy qutqaryp aldy, dep habarlaıdy QazAqparat.
Eske sala ketsek, Shyǵys Qazaqstan oblysynyń Abaı aýdanynda 3500 gektar aýmaqta qurǵaq shóp órtenip jatqanyn buǵan deıin habarlaǵan bolatynbyz. Tilsiz jaýdy aýyzdyqtaýǵa oblystyq TJD, Ulttyq ulan áskerı bóliminen 30 sarbaz men jergilikti atqarýshy organdardyń kúsh-quraldary jumyldyrylǵan edi.
«Ózderine bólinip bergen Qońyar-Áýlıe qonaq úı kesheniniń aýdanynda tilsiz jaýdy aýyzdyqtaý barysynda Ulttyq ulannyń «Shyǵys» óńirlik qolbasshylyǵyna qarasty 68303 áskerı bóliminiń qutqarý rotasynyń komandıri, efreıtor Rýslan Erkebaev er adamdy qutqaryp qaldy. Túngi ýaqytta Ulttyq ulan sarbazdary jaıaý qalpy órtti sóndirip júrgen kezde kenetten olarǵa qarsy jel soqqan. Órt oshaǵyn qorshaı tilsiz jaýmen kúresip júrgen kezde Ulttyq ulan sarbazdaryna jaqyn júrgen aýyl turǵyndarynyń biriniń kıimin órt shalyp, qaýipti jaǵdaı týyndaǵan. 1989 jylǵy Oraz Aqanov atty azamattyń qaýip ushynda turǵanyn kórgen Rýslan Erkebaev qyzyl jalynnyń ústinen sekirip ótip, otyzdaǵy jigitti aman alyp qaldy. Aqanovqa birden alǵashqy medıtsınalyq kómek kórsetildi», - dep habarlaıdy «Shyǵys» óńirlik qolbasshylyǵynyń baspaóz qyzmetiniń bastyǵy Baǵdat Amangeldi.
Qazirgi ýaqytta Abaı aýdanynda Oraz Aqanov aýrýhanada aýyr halde jatqany habarlanyp otyr.
Baǵdat Amangeldiniń habarlaýynsha, úsh táýliktiń ishinde Ulttyq ulan sarbazdary 122 shaqyrymǵa deıin sozylǵan órtti sóndirgen.
