ShQO-da sańyraýqulaq terýge shyǵyp, joǵalyp ketken adamdy túni boıy izdedi
ÓSKEMEN. QazAqparat – Shyǵys Qazaqstan oblysynda sańyraýqulaq terý úshin ormanǵa ketip, iz-tússiz joǵalǵan adam izdestirildi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, Borodýlıha aýdanyndaǵy qaraǵaıly ormanǵa sańyraýqulaq terýge baratyndar az emes. Qaraǵaılar men qumdy tóbelerde adasyp ketý op-ońaı. Sańyraýqulaq terýge shyǵyp adasqan 54 jastaǵy er adamdy týystary, ormanshylar, polıtseıler men órt sóndirýshiler izdestirdi.
«Qas qaraıyp ketse de, olar adam joǵalǵan aýmaqtyń 1 shaqyrym radıýsyn túgel sharlady, biraq esh nátıje shyqpaǵan. 18 qyrkúıek tańǵy saǵat 5-ten bastap izdeý jalǵasty. Joǵalǵan adam ıtimen birge bolǵandyqtan olar iz kesti. Alaıda qumnan eshqandaı iz tabylmaǵan», - dep habarlady vedomstvo ókilderi.
Órt sóndirý bóliminiń qyzmetkeri Arman Qarymsaqov ýchaskelik polıtsııa qyzmetkerimen birge basqa alańda izdeý jumystaryn júrgizý úshin jaqyn mańdaǵy eldi mekenge bardy. Munda olar «Semeı-Rýbtsovsk» tasjolynyń boıyndaǵy Berezovka shıpajaıynyń janynda ıtimen birge júrgen azamatty kórgen aýyl turǵynyn anyqtady.
Kóp uzamaı joǵalǵan adam sol jerden tabylǵan.
Er adam kóligin qoıǵan jerden alysqa ketip qalyp adasqanyn aıtty. Tún kezinde ormanda túneýge májbúr bolǵan.
Tańerteń ol kún shyqqan jaqqa qarap, shyǵysqa qaraı jyljydy. Qazir onyń jaǵdaıy birqalypty, medıtsınalyq kómek qajet emes.
