ShQO-da salynatyn maı zaýytynyń ónimderi shetelge eksporttalmaq

ÓSKEMEN. QazAqparat – Shyǵys Qazaqstan oblysynda maıly daqyldardy óńdeıtin zaýyt salynýda, dep habarlaıdy QazAqparat tilshisi.

Jańa zaýyt kún saıyn 1000 tonnadan astam kúnbaǵys maıyn shyǵaratyn bolady.

Ónimder Qytaı, Ózbekstan, Tájikstan, Iran, Úndistan, Pákistan, Aýǵanstan, Túrkııa jáne Eýroodaq elderine eksporttalatyn bolady.

«Zaýyttyń qurylysy 2019 jyldyń naýryz aıynda bastalǵan. «Agrarlyq nesıe korporatsııasy» AQ-nyń 5,8 mlrd teńge kólemindegi qarjylandyrýynyń arqasynda maı zaýytyna qysqa merzimde qajetti qural-jabdyqtar satyp alyndy. Qurylys tolyq aıaqtalyp, kásiporyn iske qosylǵannan keıin 200-den astam adam jumysqa tartylmaq», - deıdi «QAZAQ ASTYQ GROUP» JShS dırektorynyń orynbasary Altynbek Nuratuly.

Daıyn ónimniń sapasyn qamtamasyz etý úshin basqarýshy laýazymdarǵa Ýkraınadan tájirıbeli mamandar shaqyrylǵan.

Maı zaýytynda shyǵarylatyn daıyn ónimniń 90%-dan astamy syrtqy naryqqa jiberiledi.

Qazirgi ýaqytta shet memlekettermen kelisimshart jasasý boıynsha kelissóz júrgizilip jatyr.

Sondaı-aq tazartylǵan maı quıý tsehyn paıdalanýǵa berý josparlanǵan.

Aıta keteıik, kúnbaǵys maıyn eksporttaýdy «QAZAQ-ASTYQ GROUP» JShS-ǵa «Qazaqstan Damý Banki» AQ qarjylandyrǵan.

Úsh jyl merzimge berilgen nesıe kólemi 4,4 mlrd teńgeni qurap otyr.

Esterińizge sala ketsek, osyǵan deıin Semeıde maı zaýyty salynyp jatqany habarlanǵan.