ShQO-da salynyp jatqan Qazaqstandaǵy eń bıik kópir qurylysyn aıaqtaýǵa qarjy áli bólinbegen
ÓSKEMEN. KAZINFORM – Shyǵys Qazaqstan oblysyndaǵy respýblıkalyq mańyzy bar «Óskemen-Altaı-Úlken Naryn-Katonqaraǵaı-Rahman qaınarlary» tasjoly qazir qaıta jańǵyrtýdan ótip jatyr. Sonyń aıasynda Osınov asýynda Qazaqstandaǵy eń bıik kópir qurylysy bastalǵan bolatyn. Alaıda ony aıaqtaýǵa qajetti qarjy bólý máselesi áli sheshimin tappaı otyr.
9 mlrd qajet
Buryn Óskemennen Katonqaraǵaı aýdanyna bet alǵan jurt 56-72 jáne 72-88 shaqyrymdarǵa jetkende birshama kidirip qalatyn. Osy eki ýchaskede qaıta jańǵyrtý júrgizýge 9,9 mlrd teńge bólinýi tıis.
– Jumysty bastaý úshin bizge 900 mln teńge bólingen. Qazir nysanda 130-ǵa tarta maman eńbektenip jatyr, 40-tan astam arnaıy mamandandyrylǵan tehnıka jumyldyrylǵan. Jobany kúrdelendirip turǵan qurylystardyń biri – Pıhtovka ózeni arqyly ótetin kópir. Onyń uzyndyǵy – 175 metr, bıiktigi – 45 metr. Kópir segiz tirekten jáne jeti aralyqtan turady. Shatqal ishinde bıik tireýler qoıý ońaı sharýa emes. Tóńirek te tar, – deıdi «OblShyǵysJol» JShS dırektorynyń orynbasary Nurbek Turarov.
Bul jerde tehnıka ornalastyrý da aldyn ala esepteýdi qajet etedi. Sebebi qurylys alańynyń sheńberi shekteýli. Bárin jumysqa yńǵaıly etip qoıý kerek.
Nurbek Turarovtyń aıtýynsha, merdiger kompanııa bólingen 900 mln teńge tolyqtaı ıgerilgen. Al ary qaraı qarjylandyrý máselesi áli sheshimin tappaǵan. Degenmen qaıta jańǵyrtýǵa qajet armatýra, temir beton buıymdary satyp alynyp, qurylys alańyna jetkizildi.
– Beton aralastyratyn quraldy osy jaqqa alyp keldik. Óıtkeni kópir qurylysy kezinde betonnyń sapaly bolýyna mán beriledi. Sol talaptardy saqtaý úshin beton qospasyn ázirleıtin qurylǵyny osynda ákelip ornalastyrdyq. Munda bizdiń arnaıy zerthanamyz bar. Nysanǵa kúndelikti avtorlyq jáne laborotorııalyq tekserý júrgizilip otyrady. Jumysty bıyl aıaqtaýǵa bel býyp otyrmyz. Qarjylandyrý máselesiniń sheshilýi de mańyzdy. Kópir qurylysynyń 65 paıyzy támamdalsa, joldyń 90 paıyzy aıaqtaldy, – deıdi Nurbek Turarov.
Málim bolǵandaı, jolǵa qıyrshyq tasty-mastıkalyq asfalt tóselip jatyr. 56-72 jáne 72-88 shaqyrymdaǵy qaıta jańǵyrtý jumystary 2017 jyly bastalǵan. «OblShyǵysJol» JShS-ǵa deıin eki merdiger uıym jumysty bastap, aıaqtaı almaı ketti. Endi merdiger taǵy 9 mlrd teńge bólinýi tıis dep otyr.
Jumys sapasyna kim jaýapty?
Jol aktıvteri «Ulttyq sapa ortalyǵy» ShQO boıynsha fılıalynyń ókili Aıdos Qabylbekovtiń aıtýynsha, sáýir bastalǵaly 24 ret tekserý júrgizildi. Sonyń aıasynda 71 synama alynyp, qıyrshyq tas, qum sekildi ınertti materıaldar tekserilgen. 10 márte alǵan synama standartqa saı bolmaı shyqty.
– Kern alý barysynda qıyrshyq tasty mastıka qabaty talapqa saı bolmaǵandyqtan birtalaı jerdiń asfalty qyryldy. Shamamen 22 myń shart metr jol jabynynyń qabaty qyrylyp alyndy. Endi soǵan jańadan tóseletin bolady, – deıdi Aıdos Qabylbekov.
«QazAvtoJol UK» ShQO fılıaly dırektorynyń orynbasary Aıbek Qasenovtiń aıtýynsha, qazir 16 shaqyrym jol jóndelip jatyr. Jańa jol qoldanysqa berilse, taǵy tórt shaqyrymǵa qysqarady.
– Bul jer taýly aımaq bolǵandyqtan qysta kólik qozǵalysy qıyndaıdy. Qar kóshkini de jıileıdi. Jobanyń iske asyrylýynyń bir sebebi osy. Taǵy aıta keterligi, «Óskemen-Altaı-Úlken Naryn-Katonqaraǵaı-Rahman qaınarlary» tasjoly – týrıstik baǵyt. Jolmen júretinder sany da jyl saıyn artyp keledi. Bul Qazaqstandaǵy eń bıik kópir. Segiz tireýdiń altaýynda jumys tolyq aıaqtaldy. Qalǵan ekeýin jýyqta aıaqtaımyz. Kópir qurylysy aıaqtalsa, asfalt ta birqalypty tóselmek. Qarjy mınıstrligi qalǵan 9 mlrd teńgeni bólýdi maquldasa, jumysqa da serpilis bolar edi, – deıdi ol.
Eske salsaq, osy jyldyń maýsym aıynyń sońynda ShQO-daǵy Osınov asýynda kópirge zaqym kelip, qozǵalys shektelgen bolatyn.
