ShQO-da salyq tólemegenderdi anyqtaý úshin 110-nan astam reıd júrgizildi
ÓSKEMEN. KAZINFORM — Shyǵys Qazaqstan oblysynda salyq tóleýge qatysty baqylaý kúsheıtildi. Jyl basynan beri Memlekettik kirister departamenti 110-nan astam reıd júrgizip, tirkelmegen kásipkerlerdi anyqtaǵan.
Departament basshysynyń orynbasary Qabysh Saıranhannyń aıtýynsha, tekseris barysynda birqatar kásipkerdiń tirkeýsiz jumys istep kelgeni, demalys aımaqtarynda turǵyn úıdi salyq tólemeı jalǵa bergeni jáne kiris esebin júrgizbegeni belgili boldy.
— Biz profılaktıkalyq jumystardy jáne tsıfrlyq monıtorıngti kúsheıttik. Osylaısha, qarjy aınalymyn baqylaý jáne tabysyn jasyryp júrgenderdi anyqtaý jolǵa qoıyldy. Bul bıznes ashyqtyǵyn arttyryp, salyq tóleýshilerdiń tártibin jaqsartýǵa yqpal etti, — dedi Qabysh Saıranhan.
Bıyl óńirde 108 ákimshilik quqyqbuzýshylyq tirkeldi. Tekserý nátıjesinde keıbir salyq tóleýshiler óz erkimen bereshegin japqan, qalǵandary ákimshilik jaýapkershilikke tartyldy.
— Oblys bıýdjetine túsetin salyq kólemi eki ese artyp otyr. 2025 jyldyń qańtar-qyrkúıek aılarynda jalpy túsim 336,3 mlrd teńgeni qurady. Onyń 170,3 mlrd teńgesi jergilikti bıýdjetke, 166 mlrd teńgesi respýblıkalyq bıýdjetke túsken. Respýblıkalyq bıýdjetke túsim ótken jylmen salystyrǵanda alty esege kóbeıgen, — deıdi Q.Saıranhan.
Eske salsaq, osyǵan deıin 2026 jyldan bastap salyq tóleýshilerge kepilsiz tólem merzimin shegerý jeńildigi beriletindigi habarlanǵan.
