ShQO-da saq qorǵandaryn zańsyz qazǵandarǵa qatysty tergeý júrgizilip jatyr

ÓSKEMEN. KAZINFORM - Shyǵys Qazaqstan oblysy Zaısan aýdanyndaǵy saq qorǵandaryn zańsyz qazý faktisine qatysty qylmystyq is qozǵaldy.

y
Foto: ál-Farabı atyndaǵy Qazaq ulttyq ýnıversıteti

«Shaǵanoba» arheologııalyq kesheni aýmaǵynda bolǵan oqıǵaǵa baılanysty oblys ákimdiginde jınalys ótti. Zaısan aýdany ákimdiginiń málimetinshe, 13 qarashada oqıǵa ornyna polıtsııa qyzmetkerleri barǵan.

Arheologııalyq keshen aýmaǵynda «SRS» JShS-ne tıesili tehnıkany paıdalanyp, buǵan deıin qazylǵan shuńqyrlardy topyraqpen kómý jumystary júrgizilgeni anyqtaldy. Oqıǵa ornyndaǵy azamattardyń kim ekeni anyqtalyp, tıisti materıaldar polıtsııada tirkelgen.

- Sol kúni tarıhı-mádenı murany qorǵaý salasynyń mamandary, arheolog, aýdan ákimdigi men polıtsııa ókilderi aýmaqty tekserdi. Jer qazý jumystarynyń izderi foto jáne vıdeoǵa túsirilip, tıisti akt jasalǵan. Alaıda qar jamylǵysyna baılanysty qorǵandardyń qazirgi jaı-kúıin tolyq baǵalap, keltirilgen zalaldyń kólemin anyqtaý ázirge múmkin bolmaı otyr. Qosymsha zertteý jumystary 2027 jyldyń kóktemine josparlanǵan. Qajet bolǵan jaǵdaıda shuǵyl arheologııalyq-qutqarý jumystary uıymdastyrylady, - dep habarlady ShQO ákimdiginen.

Arheologııalyq jumystardy zańsyz júrgizý deregi boıynsha QR Qylmystyq kodeksiniń 295-baby 2-bóligi 1 jáne 3-tarmaqtary negizinde qylmystyq is qozǵalǵan. Atalǵan bapta adamdar tobynyń aldyn ala sóz baılasýy arqyly, sondaı-aq arnaıy tehnıkalyq quraldar men jer qazý mashınalaryn paıdalanyp, arheologııalyq jumystardy zańsyz júrgizgeni úshin jaýapkershilik kózdelgen. Qazir sotqa deıingi tergeý amaldary júrgizilýde.

Eske salsaq, osyǵan deıin Zaısan aýdanyndaǵy «Shaǵanoba» arheologııalyq kesheniniń qorǵandaryna zaqym keltirilýi múmkin ekeni týraly áleýmettik jelilerde taraǵan aqparatqa qatysty ShQO ákimdigi jaýap qatqany habarlanǵan.