ShQO-da Rıdderge aparatyn jańa jol qurylysy sol kúıi bastalǵan joq

ÓSKEMEN. KAZINFORM - Shyǵys Qazaqstan oblysyndaǵy Rıdder qalasyna deıingi jol ýaqytyn 1 saǵatqa deıin qysqartatyn jańa joldyń jobasy ázirge tek jospar kúıinde qalyp otyr.

Halyqtyń jaz kezinde qurylys bastalady degen úmiti aqtalmady. Óskemen-Tarhanka-Topıha- Cheremshanka baǵytyndaǵy jol jobasy qarjy bólinbeýine baılanysty iske asyrylmaı tur.

Quny 38,6 mlrd teńge bolatyn jobaǵa qarajattyń 90%-yn respýblıkalyq bıýdjetten bólý kózdelgen-tuǵyn. Merdiger kompanııa bolyp ótken jyly Kurylys Group RK bekitilip te qoıǵan.

- Joba qarjylandyrýdy pysyqtaý satysynda tur. Bıýdjettik ótinim respýblıkalyq bıýdjetke joldandy, biraq qarjy bólý týraly sheshim áli qabyldanǵan joq, - deıdi oblystyq Jolaýshy kóligi jáne avtomobıl joldary basqarmasy basshysynyń orynbasary Nurbek Turarov.

Jańa jol Rıdderge deıingi qashyqtyqty 43 shaqyrymǵa qysqartyp, sapar ýaqytyn shamamen bir saǵatqa azaıtýy tıis. Joba aıasynda 14,5 shaqyrym jańa jol tóseý jáne qoldanystaǵy ýchaskelerdi rekonstrýktsııalaý josparlanǵan. Sondaı-aq Úlbi ózeninen kópir salý, Tarhankadan keıingi kópirdi jóndeý, Cheremshanka mańynda jáne Tarhankadan keıin eki ótpejol salý qarastyrylǵan.

Topıha turǵyndarynyń aıtýynsha, jańa tasjol shalǵaıdaǵy aýyldarǵa jan bitirer edi.

- Bizdiń Tarhanka men Topıha óte kórikti jerler. Biraq kópshilik ol jerlerdi bile bermeıdi. Jańa jol salynsa, damý múmkindigimiz áldeqaıda artar edi, - deıdi aýyl halqy.

Budan bólek, bul jol Qazaqstandy Reseı jáne Mońǵolııamen baılanystyratyn halyqaralyq kólik dáliziniń bir bóligine aınalmaq.

Óńir jurtshylyǵy jańa joldy qarjylandyrý máselesi jaqyn arada sheshimin tabady dep úmittenedi.

Eske salsaq, osyǵan deıin ShQO-da 20 tamyzdan bastap Rahman qaınaryna aparatyn jol jabylatyndyǵy habarlanǵan.