ShQO-da respýblıkalyq aqyndar aıtysy ótedi
ASTANA. QazAqparat - Shyǵys Qazaqstan oblysynyń Kókpekti aýdany Kókpekti aýylynda aqyn Qalıhan Altynbaevtyń 90 jyldyǵyna arnalǵan «Jyr tunǵan Kókpektiniń jaǵasynda» atty respýblıkalyq aqyndar aıtysy ótedi, dep habarlaıdy «QazAqparat» HAA tilshisi.
Bul týraly Kókpekti aýdanynyń «Juldyz» jáne «Novaıa jızn» basylymdarynyń dırektory Darhan Berdibekuly habarlady.
«Respýblıkalyq aqyndar aıtysy 16 qarashada ótedi. Sóz dodasyna elimizge belgili Rınat Zaıtov, Rústem Qaıyrtaıuly, Serik Qýanǵan, Ásem Erejeqyzy, Toba Ótepbaev, Ońǵar Qabden, Marat Ahmetov, Nurlybek Qurmanov, Manarbek Satybaldy, Jasulan Maqaev sekildi aqyndar qatysady. Aıtysty Júrsin Erman júrgizedi», - deıdi Darhan Berdibekuly.
Aıtys aýdandyq Mádenıet úıinde saǵat 14:30-da bastalady.
Aıta ketsek, aıtys aqyny Qalıhan Altynbaev respýblıkalyq aıtystardyń jeńimpazy. 1927 jyly 27 qarashada burynǵy Semeı oblysynyń Jarma aýdanyndaǵy Malaı aýylynda dúnıege kelgen. «Aqyndar jyry» (1961), «Aıtys» (3 tom, 1966), «Aqyndar shyqty aıtysqa» (1969), «Qazaqtyń qazirgi poezııasy» (1975) jınaqtarynyń, «Dala besik», «Qııal qanatynda» jyr jınaqtarynyń, «Qalbataý», «Aqsýat», «Kókpekti» tanymdyq zertteý kitaptarynyń avtory.
