ShQO-da resmı saıtta jalǵan aqparat jarııalaǵan bólim basshysy jaýapqa tartyldy

ÓSKEMEN. KAZINFORM — ShQO-nyń Samar aýdany jer qatynastary bóliminiń basshysy memlekettik organnyń resmı ınternet-resýrsynda jalǵan aqparat ornalastyrǵany úshin ákimshilik jaýapkershilikke tartyldy.

Aýdan prokýratýrasy júrgizgen taldaý nátıjesinde ákimdiktiń saıtynda bos jer ýchaskeleri týraly rastalmaǵan málimetter jarııalanǵany anyqtaldy.

- Atap aıtqanda, shabyndyq jer kólemi 180,34 gektar, jaıylym 30,62 gektar dep kórsetilgen. Alaıda, «Azamattarǵa arnalǵan úkimet» KEAQ ShQO fılıalynyń málimetteri boıynsha bul kórsetkishter tıisinshe 193,4 jáne 30,0 gektardy quraıdy.

Osyǵan baılanysty aýdan prokýratýrasy laýazymdy tulǵaǵa qatysty QR ÁQBtK-niń 456-2-babynyń 1-bóligi (memlekettik organnyń jalǵan aqparat taratýy) boıynsha ákimshilik is qozǵady, - dep jazdy baqylaýshy organnan.

Bıylǵy 25 maýsymda Samar aýdandyq sotynyń qaýlysymen bólim basshysy kináli dep tanylyp, oǵan 117 960 teńge kóleminde aıyppul salyndy. Sot sheshimi zańdy kúshine endi.

Bul – respýblıka boıynsha ÁQBtK-niń 456-2-baby aıasynda jalǵan aqparat taratqany úshin laýazymdy tulǵany ákimshilik jaýapkershilikke tartýdyń alǵashqy jáne ázirge jalǵyz faktisi.

Aıta keteıik, ShQO-da bos jatqan 64 myń gektardan astam jer memleketke qaıtaryldy.