ShQO-da Reseı azamaty joǵaltqan sómke beınebaqylaý arqyly tabyldy
ASTANA. KAZINFORM — Shyǵys Qazaqstan oblysynda Reseı azamatynyń joǵalǵan sómkesi tabyldy. Onyń ishinde jeke qujattary, balalarynyń qujattary jáne aqshasy bolǵan.
Oqıǵa Shemonaıha aýdanynda bolǵan. Óskemenge bara jatqan Reseı Federatsııasynyń azamaty Evgenııa Shelehova sómkesin joǵaltyp alǵanyn aıtyp, polıtsııaǵa júgingen.
Ótinish boıynsha izdeý jumystary bastalyp, polıtsııa qyzmetkerleri beınebaqylaý kameralaryndaǵy jazbalardy teksergen. Nátıjesinde áıeldiń júrgen baǵyty anyqtalyp, sómkeniń joǵalǵan orny belgilengen.
Tabylǵan sómkeniń ishindegi zattardyń barlyǵy tolyq saqtalǵany anyqtalyp, ıesine qaıtaryldy.
— Tólqujatym, balalarymnyń qujattary, aqsham — bári aman-esen tabyldy. Kómek kórsetken polıtsııa qyzmetkerlerine alǵys aıtamyn, — dedi Evgenııa Shelehova.
Eske salaıyq, buǵan deıin Astanada beınebaqylaý kameralarynyń sany bir jylda eki ese artqanyn jazǵanbyz.
