ShQO-da relsten shyǵyp ketken 18 vagonǵa qatysty tekserý aıaqtaldy
ÓSKEMEN. QazAqparat – Shyǵys Qazaqstan oblysynda relsten shyǵyp ketken 18 vagonǵa qatysty tekserý aıaqtaldy, dep habarlaıdy QazAqparat tilshisi.
3 sáýir kúni saǵat 12.04-te Óskemen-Kúmistaý temirjol ýchaskesinde júk poıyzynyń 18 vagony relsten shyǵyp ketken bolatyn. Onyń altaýy Ertis ózenine qulady. Bes vagonda shlak, bireýinde rýda tıelgen. Atalǵan fakti boıynsha ShQO Ekologııa departamentiniń mamandary tekserý júrgizdi.
«Apat sebepterin anyqtaý úshin QR Indýstrııa jáne ınfraqurylymdyq damý mınıstriniń buıryǵymen komıssııa qurylyp, quramyna joǵary bilikti mamandar engizilgen. Temirjol qurylystaryn komıssııalyq tekserý kezinde tehnıkalyq kútip-ustaýda eshqandaı buzýshylyq tirkelgen joq. Qazirgi ýaqytta QR ІІM kóliktegi polıtsııa departamentiniń Óskemen-1 stantsııasyndaǵy jelilik polıtsııa bólimi Ertis ózeniniń lastanýyna ákep soqqan temirjol apaty faktisi boıynsha qylmystyq is qozǵady», - dep habarlady departamenttiń baspasóz qyzmeti.
Vedomstvo dereginshe, vagondardyń apatqa ushyraýyna jáne Ertis ózeniniń lastanýyna kináli tulǵalardyń qandaı jazaǵa tartylatyny tergeý jumystary aıaqtalǵannan keıin belgili bolady.
«QTJ – Júk tasymaly» AQ-nyń Semeı bólimshesi bir aı ishinde remedıatsııa baǵdarlamasyn ázirleý qajettigi týraly habardar etildi. Remedıatsııa baǵdarlamasy degenimiz – apattyń saldaryn joıý jáne ekologııalyq zalaldy óteý.Osy baǵdarlama sheńberinde sýǵa batqan vagondar men olardyń júgin kóterip shyǵarý, sondaı-aq plankton men sý bıoresýrstarynyń jaı-kúıine monıtorıng júrgizý máseleleri qaralatyn bolady», - delingen aqparatta.
