ShQO-da raqymshylyq jasaý týraly zań aıasynda 44 adam túrmeden bosap shyǵady

ÓSKEMEN. KAZINFORM — Shyǵys Qazaqstan oblysynda Konstıtýtsııanyń 30 jyldyǵyna oraı raqymshylyq jasaý týraly zań aıasynda 18 adam túrmeden bosap shyqty.

Oblys boıynsha raqymshylyqqa ilingenderdiń biri — esirtkige qatysty qylmys jasaǵany úshin sottalǵan 72 jastaǵy qarııa. Ol sot zalynda kózine jas aldy. Zeınetker kolonııada 7 aı otyrǵan, al bostandyqqa 2026 jylǵa qaraı shyǵýy kerek bolatyn.

— Baýyrymdy kóp ýaqyt kórmedim. Endi ol meniń qasymda. Qýanyshymyzda shek joq, — dedi raqymshylyq alǵan azamattyń qaryndasy.

Shyǵys Qazaqstan oblysynda Konstıtýtsııanyń 30 jyldyǵyna oraı jarııalanǵan raqymshylyqtyń arqasynda qazir 18 adam bostandyqqa shyqty.

Jalpy óńirde 405 sottalǵan adam raqymshylyqqa ilikti. Onyń ishinde 44 adam tolyqtaı bosatylsa, al 361 adamnyń jaza merzimi qysqartylady. Sottarǵa 234 materıal jiberilip, onyń 31-i qaraldy.

— Raqymshylyq — bul jaı ǵana quqyqtyq protsedýra emes. Bul memleket tarapynan jasalǵan gýmanızm aktisi, kezinde qatelesken adamdarǵa túzelýge naqty múmkindik berý. Biz adamdardyń qalaı ózgerip jatqanyn, olardyń osy ekinshi múmkindikti qalaı baǵalaıtynyn kórip otyrmyz, — deıdi ShQO QAJD bastyǵynyń orynbasary, ádilet polkovnıgi Tileýbergen Kónekbaev.

Eske salsaq, osyǵan deıin Mańǵystaýda 479 adam raqymshylyqqa ilikkeni habarlanǵan.