ShQO-da iri qaraǵa túlkiden taraǵan qutyrý oshaǵy oqshaýlandy

ÓSKEMEN. KAZINFORM — Shyǵys Qazaqstan oblysy Zaısan aýdanynda iri qara mal arasyna túlkiden qutyrý aýrýy tarap ketken.

Bul týraly ShQO Óńirlik kommýnıkatsııalar qyzmetinde ótken brıfıngte oblystyq veterınarııa basqarmasynyń basshysy Ramıl Saǵandykov málimdedi.

— Túlki der kezinde qolǵa túsip, júrgizilgen dıagnostıkalyq zertteýler nátıjesinde janýardan qutyrý vırýsy anyqtalǵan. Aýrý oshaǵy anyqtalǵannan keıin mamandar iri qara mal basyn jedel tekserýden ótkizdi. Zerthanalyq saraptama qorytyndysy boıynsha bes sıyrdyń qutyrý juqtyrǵany belgili boldy, — dedi ol.

Infektsııa oshaǵynda epızootııaǵa qarsy barlyq qajetti sharalar shuǵyl túrde júrgizildi. Shekteý sharalary engizilip, tórt túlik oqshaýlandy jáne keshendi sanıtarlyq óńdeý jumystary qolǵa alyndy.

— Ótken jyly osyndaı jaǵdaı kórshiles Tarbaǵataı aýdanynda tirkelgen. Ol kezde túlki úı janýaryn tistegenimen, zerthanalyq tekserý nátıjesinde odan qutyrý vırýsy tabylǵan joq, — dedi R.Saǵandyqov.

Eske salsaq, osyǵan deıin Atyraýda jeltoqsannan beri juqpaly aýrý anyqtalǵan iri qara sany 4,5 myńnan asqany habarlanǵan.