ShQO-da iri esirtki arnasy joıylyp, mefedronnyń 6 myńnan astam dozasy tárkilendi
ÓSKEMEN. KAZINFORM – Shyǵys Qazaqstan oblysynda iri esirtki arnasy joıylyp, mefedronnyń 6 myńnan astam dozasy tárkilendi.
Oblystyq Polıtsııa departamenti Esirtki qylmysyna qarsy kúres basqarmasynyń qyzmetkerleri eldiń ońtústik óńirlerinen ShQO-ǵa sıntetıkalyq esirtki tasymaldaıtyn iri arnanyń jolyn kesti.
«Tártip saqshylary «Almaty-Óskemen» tasjolynda Almaty oblysynyń 26 jastaǵy turǵynynyń basqarýyndaǵy «Toıota Land Krýzer» avtokóligin toqtatqan. Kólikti tintý barysynda jedel ýákilder aq tústi untaq zaty bar 4 polımerli paketti tapty. Sonymen qatar kóliktiń bagajynda jatqan osyǵan uqsas zat salynǵan taǵy 15 orama tárkilendi», - dep habarlady departamenttiń baspasóz qyzmeti.
Saraptama qorytyndysyna sáıkes, tárkilengen zattyń «mefedron» ekeni anyqtaldy. Jalpy salmaǵy – 1 keli 850 gr. Bul – bir rettik 6000-nan astam doza.
«Jaýap alý barysynda er adam esirtkini Astana men Pavlodarda taratqanyn aıtty. Kúdiktige qatysty esirtki quraldaryn, psıhotroptyq zattar men olardyń analogtaryn zańsyz satyp alǵany, saqtaǵany, ótkizgeni úshin qylmystyq is qozǵaldy. Qazirgi ýaqytta ol qamaýǵa alynǵan», - delingen aqparatta.
Er adam múlki tárkilenip, onnan on bes jylǵa deıingi merzimge bas bostandyǵynan aıyrylýy múmkin.
