ShQO-da psıhotroptyq dári-dármekti satýmen aınalysqan emhana qyzmetkeri ustaldy

ÓSKEMEN. QazAqparat – Shyǵys Qazaqstan oblysynda psıhotroptyq zattardy satýmen aınalysqan narkologııalyq emhana qyzmetkerine qatysty qylmystyq iz qozǵaldy, dep habarlaıdy QazAqparat tilshisi.

ShQO polıtsııa departamenti esirtki qylmysyna qarsy is-qımyl basqarmasynyń qyzmetkerleri nashaqorlar men ishimdikke berilgen adamdardy ońaltýmen aınalysatyn jekemenshik emhana qyzmetkerin qolǵa túsirdi.

26 jastaǵy er adam psıhotroptyq zattardy zańsyz satyp, paıda tapqan.

«Kúdiktiniń kóligin tintý barysynda tergeýshiler birqatar preparatty tapty. Sondaı-aq onyń jumys ornynan psıhotroptyq zattar tárkilenip, saraptamaǵa jiberildi. Qazirgi ýaqytta tártip saqshylary sotqa deıingi tergeý amaldaryn júrgizýde», - deıdi departament bastyǵy, polıtsııa polkovnıgi Saǵat Madıev.