ShQO-da prokýratýranyń aralasýynan keıin ınvestordyń quqyǵy qorǵaldy
Shyǵys Qazaqstan oblysynyń prokýratýrasy sot oryndaýshylardyń áreketsizdiginen jumysyna kedergi kelgen ınvestordyń quqyǵyn qorǵady, dep habarlaıdy QazAqparat tilshisi.
ShQO prokýratýrasy baspasóz qyzmetiniń málimetine súıensek, ınvestorlar quqyǵynyń buzylýyna jol bermeý maqsatynda óńirde prokýratýranyń front-keńsesi jumys isteıdi. Onyń jumysyna barlyq múddeli organdar qosylǵan.
«Keńsege «Vostokmashzavod» AQ ınvestory júgindi. Belgili bolǵandaı, kompanııa boryshkerlerdiń biryńǵaı tiziliminde bolmaýyna qaramastan onyń shottary men múlkine salynǵan tyıym alynbaǵan. Bul «Atqarýshylyq is júrgizý jáne sot oryndaýshylarynyń mártebesi týraly» zańnyń 36-babynyń 3-tarmaǵy men 47-babynyń 2-tarmaǵyna qaıshy. Osylaısha, sot oryndaýshylarynyń áreketsizdigi ınvestıtsııalyq jobany iske asyrýǵa kedergi keltirdi», - delingen aqparatta.
Investordyń bul máseleni sheshý úshin sot oryndaýshylaryna óz betinshe jasaǵan ótinishteri esh nátıje bermegen.
«Oblys prokýratýrasynyń aralasýynan keıin ǵana ShQO Ádilet departamenti «Vostokmashzavod» AQ shottary men múlkine shekteýlerdi alyp tastaý úshin tıisti sharalardy qabyldady. Investordyń quqyǵy qorǵalyp, másele sheshildi», - delingen habarlamada.