ShQO-da prokýratýra jer telimderin berý rásimindegi zańsyz kedergilerdi joıdy
ÓSKEMEN.KAZINFORM – Shyǵys Qazaqstan oblysy Ulan aýdanynyń prokýratýrasy jer qatynastary salasyn taldaý barysynda aýyl sharýashylyǵy maqsatyndaǵy jer ýchaskelerin berý jónindegi konkýrsty uıymdastyrýdaǵy zańbuzýshylyqtardy anyqtady.
Shyǵys Qazaqstan oblystyq prokýratýrasynyń baspasóz qyzmetiniń habarlaýynsha, tekserýge Kásipkerler palatasy Ulan aýdandyq fılıalynyń ótinishi negiz boldy.
Jergilikti atqarýshy organnyń 4 ýchaske boıynsha ýaqytsha óteýli jer paıdalaný quqyǵyna konkýrs jarııalaǵany anyqtaldy.
Alaıda, ótinimderdi qabyldaý aıaqtalǵannan keıin qorytyndy shyǵarylmaǵan, qatysýshylardyń ótinishteri eki aıdan astam ýaqyt boıy qaraýsyz qalǵan, bul negizsiz ákimshilik kedergiler týdyryp, azamattardyń sharýashylyq júrgizý quqyqtaryn shektegen jáne jerdiń ekonomıkalyq aınalymǵa tartylýyna kedergi keltirgen.
Anyqtalǵan buzýshylyqtar faktileri boıynsha aýdan prokýratýrasy aýdan ákiminiń atyna qadaǵalaý aktisin engizdi.
Prokýrorlardyń aralasýynyń arqasynda konkýrstyq rásimder tolyq aıaqtalyp, ótinimder qaraldy, al ýchaskeler boıynsha jeńimpazdar anyqtaldy.
Nátıjesinde konkýrsqa qatysqan 6 adamnyń quqyǵy qorǵalyp, kináli laýazymdy tulǵalar tártiptik jaýapqa tartyldy.
-Kásipkerlerdiń quqyqtaryn qorǵaý jáne memlekettik qyzmetterdiń ashyqtyǵyn qamtamasyz etý máseleleri prokýratýra organdarynyń erekshe baqylaýynda qalady,-delingen habarlamada.
Osyǵan deıin Qazaqstanda «prokýrorlyq súzgi» tetigi men ınvestor-prokýrorlardyń jumysynyń nátıjesinde ınvestorlarǵa qatysty tekserýler men ákimshilik jaýaptylyqqa tartý jaǵdaılary azaıǵany týraly jazdyq.
