ShQO-da prokýratýra aralasqannan keıin 811 turǵyn qajetti dári-dármekpen qamtamasyz etildi
ASTANA. KAZINFORM — Ulan aýdanynyń prokýratýrasy halyqty dári-dármekpen qamtamasyz etýdiń zańdylyǵy máselelerin taldaý barysynda azamattardyń konstıtýtsııalyq quqyqtarynyń óreskel buzylý faktilerin anyqtady. Bul týraly Shyǵys Qazaqstan oblysy prokýratýrasy málim etti.
Anyqtalǵandaı, aýdandyq aýrýhanada dıspanserlik esepte turǵan 811 azamat memleket kepildik bergen tegin medıtsınalyq kómek sheńberinde qajetti dárilik zattarmen ýaqytyly qamtamasyz etilmegen. Prokýrorlyq qadaǵalaý aktisi boıynsha zańbuzýshylyqtar joıyldy.
— Patsıentter qajetti dári-dármektermen tolyq kólemde qamtamasyz etilip, azamattardyń buzylǵan konstıtýtsııalyq quqyqtary qalpyna keltirildi. Prokýrordyń usynysy boıynsha kináli laýazymdy tulǵa tártiptik jaýapkershilikke tartyldy. Azamattardyń densaýlyǵyn saqtaýǵa arnalǵan konstıtýtsııalyq quqyqtarynyń saqtalý máseleleri prokýratýranyń erekshe baqylaýynda, — delingen habarlamada.
Aıta keteıik, Prokýratýra jyl saıyn 1 mıllıonnan astam balanyń quqyǵyn qorǵaıdy.
