ShQO-da probatsııa qyzmetkeri para alyp jatqan jerinen ustaldy

ÓSKEMEN. KAZINFORM –  Shyǵys Qazaqstan oblysy Ulan aýdanynda para alǵan probatsııa qyzmetkeri 12 mln teńge aıyppul tóleýge mindetteldi.

ShQO soty baspasóz qyzmetiniń málimetine súıensek, oqıǵa osy jyldyń sáýir aıynda bolǵan. Ulan aýdanynyń probatsııa qyzmetkeri sottalǵan adamnan 400 myń teńge kóleminde para talap etken.

- Sebebi oǵan bas bostandyǵyn shekteý jazasy bas bostandyǵynan aıyrýǵa aýystyrylý qaýpi bar edi. Osyny boldyrmaý úshin ınspektor materıaldardyń sotqa jiberilmeýine kómektesetindigin aıtyp, ýáde bergen, - delingen aqparatta.

Probatsııa qyzmetkeri aqshany alyp jatqan kezde ony Sybaılas jemqorlyqqa qarsy qyzmet ókilderi ustady.

- Sot barysynda prokýror ınspektordy 3 jyl 6 aı merzimge bas bostandyǵynan aıyrýdy surady. Dese de, Ulan aýdandyq sotynyń sheshimimen aıyptalýshy 12 mln teńge kóleminde aıyppul tóleýge mindettedi. Sonymen qatar ol kapıtan sheninen aıyryldy, - delingen habarlamada.

Eske salsaq, osyǵan deıin Jambyl oblysynda tyıym salynǵan dinı materıal taratqan top sottalǵany habarlanǵan.