ShQO-da probatsııa qyzmetkerine pyshaqpen shabýyl jasaǵan er adam jazalandy
ÓSKEMEN. QazAqparat – Shyǵys Qazaqstan oblysynda birneshe azyq-túlik dúkenin tonaǵany úshin sottalǵan er adam probatsııa qyzmetkerine pyshaqpen shabýyl jasaǵan, dep habarlaıdy QazAqparat tilshisi.
ShQO boıynsha QAJ departamenti baspasóz qyzmetiniń málimetine súıensek, probatsııa qyzmetinde esepte turǵan azamat bılik ókilin qorlap, pyshaqpen shabýyl jasaǵan.
«40 jastaǵy er adam azyq-túlik dúkenine birneshe ret urlyq jasaǵany úshin sottalyp, probatsııa qyzmetine esepke alynǵan. Turǵylyqty jeri boıynsha tekserý kezinde ol probatsııa qyzmetkeriniń zańdy talaptaryn oryndamady. Onymen qoımaı, óz mindetterin oryndap júrgen bılik ókiline bylapyt sózder aıtyp, oǵan pyshaqpen shabýyldaǵan. Abyroı bolǵanda, jábirlenýshige eshqandaı dene jaraqaty keltirilgen joq», - delingen aqparatta.
Sot úkimimen kináli dep tanylǵan er adamǵa aıyppul salynǵan. Apellıatsııalyq shaǵymda sottalǵan óziniń kinásizdigin aıtyp, shyǵarylǵan úkimniń kúshin joıýdy surady.
Alaıda apellıatsııalyq sot istegi bar dáleldemelerdi tekserip, úkimdi ózgerissiz qaldyrdy.
Esterińizge sala ketsek, osyǵan deıin Atyraý oblysynda joǵalǵan jigittiń denesi Oıyl ózeninen tabylǵanyn habarlaǵan edik.
