ShQO-da probatsııa qyzmetinen jasyrynǵan 20-ǵa jýyq sottalýshy ustaldy
ÓSKEMEN. QazAqparat - ShQO-da jyl basynan beri probatsııa qyzmetinen jasyrynǵan 20-ǵa jýyq sottalýshy ustaldy, dep habarlaıdy QazAqparat Polisia.kz saıtyna silteme jasap.
Aımaqtaǵy probatsııa qyzmetiniń mamandary demalys jáne mereke kúnderi kúsheıtilgen túrde jumys istedi. Osylaısha polıtseılermen birge probatsııa qyzmetkerleri jyl basynan beri 20-ǵa jýyq esepke alynǵan adamdy izdestirdi, olar baqylaýdan ádeıi jasyrynǵan.
«Penıtentsıarlyq júıeniń qyzmetkerleri krımınaldyq polıtseılermen birlesip, izdeýde júrgen adamdardy ustaý boıynsha jumys júrgizdi. Sot úkimimen bostandyqta túzelýge múmkindik berilgen esepke alynǵan adamdar probatsııa qyzmetine tirkelý úshin kelýge, turǵylyqty jeriniń ózgergeni týraly, sondaı-aq turatyn jerinen tys aımaqqa josparlanatyn saparlary týraly habardar etýge mindetti. Alaıda sottalǵandar sot úkimine qaramastan, jazany óteý sharttaryn jıi buzady jáne jazany óteýden jaltarady», – dedi Soljaǵalaý aýdanynyń probatsııa qyzmetiniń aǵa ınspektory Erasyl Tólegenov.
Onyń aıtýynsha, jaqyn arada esepte turǵan adamdarǵa jazasyn óteýden jaltarý qıyn bolady. Osy jyldyń sáýir aıynan bastap olarǵa elektrondy bilezik taǵyla bastady, onyń kómegimen probatsııa qyzmetiniń mamandary jasyrynyp qalǵan esepke alynǵan adamdardyń turǵan jerin ońaı anyqtaıdy.
