ShQO-da polıtsııaǵa 1,8 mlrd teńgege saper-robot satyp alynady
ÓSKEMEN. KAZINFORM – Shyǵys Qazaqstan oblysynyń polıtsııasy úshin buryn adamdar barýǵa májbúr bolǵan qaýipti aýmaqtarda jumys isteı alatyn joǵary tehnologııaly saper-robot satyp alynady.
Qarjy bólý týraly sheshim oblystyq máslıhattyń kezekten tys sessııasynda qabyldandy. Ótimdiligi joǵary, tolyq jetekti avtokólik bazasyndaǵy jarylǵysh zattarmen jumys isteýge arnalǵan keshendi satyp alýǵa óńirlik bıýdjetten 1 mlrd 750 mln teńge baǵyttalmaq.
Bul – jetýi qıyn jerlerde jarylǵysh zattardy zalalsyzdandyrýǵa arnalǵan mobıldi júıe. Atalǵan robot nysandardy qashyqtan tekserýge múmkindik beredi. Sonyń arqasynda qyzmetkerlerdiń ómirine tikeleı qaýip tónbeıdi.
– Qarjylandyrý ótken jyldan ıgerilmeı qalǵan qarjy men sońǵy ýaqytta oblys qazynasyn tolyqtyrǵan salyqtar men aıyppuldardan túsken qosymsha túsimder esebinen bólindi, - deıdi depýtattar.
Olardyń aıtýynsha, mundaı tehnıkany satyp alý – óńir qaýipsizdigine salynǵan ınvestıtsııa. Shyǵys Qazaqstanda uzyn kólik joldary, iri óndiristik nysandar jáne shekaralyq aımaqtardyń bolýy tótenshe jáne kúshtik qurylymdardyń materıaldyq-tehnıkalyq bazasyn kúsheıtýdi talap etedi.
Eske salsaq, osyǵan deıin Pavlodarda eki polıtseıdi tistep alǵan er adam sottalǵany habarlanǵan.