ShQO-da polıtseıler júrek talmasyna ushyraǵan zeınetkerdi qutqaryp qaldy

ÓSKEMEN. KAZINFORM — Altaı aýdanynda patrýldik polıtsııa ınspektorlary kenetten ózin jaısyz sezinip, esinen tanyp, jerge qulaǵan er adamdy baıqaǵan.

ІІM baspasóz qyzmetiniń málimetinshe, bir sátke de kidirmesten polıtsııa kapıtany Rınat Qýanııazov pen polıtsııa aǵa leıtenanty Syrym Qalıqan alǵashqy medıtsınalyq kómek kórsetip, jedel járdem shaqyrǵan. Alaıda azamattyń jaǵdaıynyń aýyrlyǵyn eskerip, olar ony der kezinde jaqyn mańdaǵy aýrýhanaǵa óz kólikterimen jetkizýdi uıǵarǵan.

Medıtsına qyzmetkerleri 70 jastaǵy zeınetkerge júrek talmasy dıagnozyn qoıdy. Polıtsııa qyzmetkerleriniń shuǵyl ári kásibı áreketiniń arqasynda medıtsınalyq kómek ýaqytynda kórsetildi.

- Mundaı sátte adamdy qutqarý týraly ǵana oılaısyń. Biz tek óz boryshymyzdy oryndadyq, — dedi polıtsııa qyzmetkeri Rınat Qýanııazov.

Zardap shekken azamattyń jubaıy tártip saqshylaryna alǵysyn bildirdi.

- Rınat pen Syrym sekildi janashyrlyq tanytyp, der kezinde kómek kórsetken tártip saqshylarynyń arqasynda joldasym aman qaldy. Olarǵa shyn júrekten alǵysymdy aıtamyn, - dedi turǵyn.

Buǵan deıin qutqarýshylar kanonǵa túsip ketken er adamdy qutqarǵanyn jazǵan edik.