ShQO-da polıtseıler jolda densaýlyǵy nasharlap, ınsýlt alǵan azamatty qutqardy
ASTANA. KAZINFORM – Patrýldik polıtsııa batalonynyń qyzmetkerleri jol ústinde densaýlyǵy kúrt nasharlap, ınsýlt belgileri baıqalǵan er adamǵa jedel kómek kórsetti, - dep habarlaıdy Polisia.kz.
Óskemen – Rıdder tasjolynyń 90-shaqyrymynda qyzmet atqarý kezinde patrýldik polıtsııa batalonynyń qyzmetkerleri Azamat Oleguly men Álisher Shaıahmetov jol jıegine toqtaǵan avtokólikti baıqaǵan. Kólik júrgizýshisi salonda 38 jastaǵy azamattyń jaǵdaıy nasharlaǵanyn aıtyp, polıtseılerden kómek suraǵan.
Tártip saqshylary naýqasty dereý qalaǵa deıin ertip barý týraly sheshim qabyldaǵan. Alaıda jol júrý barysynda naýqas otyrǵan kólik buzylyp, isten shyǵyp qalǵan. Polıtseıler bul týraly aqparatty dereý jaqyn mańdaǵy kelesi narıadqa — quramynda Asylbek Bazylbekov pen Álisher Achılov bar PA-466 ekıpajyna habarlady.
Oqıǵa ornyna jetken ekinshi ekıpaj naýqasty qyzmettik avtokólikke otyrǵyzyp, barynsha jyldam ári qaýipsiz jol júrýdi qamtamasyz ete otyryp, medıtsınalyq mekemege jetkizýdi jalǵastyrdy. Eki ekıpajdyń úılesimdi is-qımylynyń arqasynda azamat Óskemen qalasyndaǵy №1 qalalyq aýrýhanaǵa ýaqytyly jetkizilip, oǵan qajetti medıtsınalyq kómek kórsetildi.
Polıtsııa qyzmetkerleriniń jedeldigi men naqty is-áreketi tótenshe jaǵdaıda árbir mınýttyń mańyzdy ekenin taǵy bir márte dáleldedi.
Aıta keteıik, Túrkistan oblysynda 23 jastaǵy áıel júktiliginiń sońǵy kezeńinde áleýmettik jeliler arqyly bolashaq sábıin satyp alatyn adamdardy izdegen. Jedel-izdestirý sharalary barysynda polıtsııa qyzmetkerleri onyń bul zańsyz áreketin der kezinde áshkerelep, qylmystyq josparyn tolyq qujattap, kúdiktini ustady.
