ShQO-da polıtseıler qylmystyq isterdi ýaqtyly qaramaı, burmalap kelgen

ÓSKEMEN. KAZINFORM – Shyǵys Qazaqstan oblysynda polıtsııa qyzmetkerleriniń jumysyn teksergen prokýrorlar talaı zańbuzýshylyqty anyqtady. Tártip saqshylary qylmystyq isterdi ýaqtyly qaramaı, burmalap kelgen.

ShQO prokýratýrasy baspasóz qyzmetiniń habarlaýynsha, óńir polıtseıleri aqparatty esepke alý kitabyna (AEK) 90 myń aryz ben habarlamany tirkeý kezinde olqylyqqa jol bergen. Onyń ishinde ýaqtyly sheshim qabyldamaý, qylmystardyń saralanýyn tómendetý, olardy jasyrý jáne statıstıkany burmalaý faktileri tirkelip otyr.

«Talap boıynsha AEK-ke túsken aryz 24 saǵat ishinde qaralýy tıis. Máselen, osy jyldyń tamyz aıynda jeke sot oryndaýshysy sot sheshimin oryndamaǵan K. esimdi azamatty jaýapkershilikke tartý týraly habarlama túsirgen. Alaıda polıtseıler esh shara qoldanbaı, 4 kúnnen keıin is materıaldaryn nomenklatýralyq óndiriske esepten shyǵarý týraly sheshim qabyldaǵan», - delingen aqparatta. 

Budan bólek, Rıdderdegi polıtsııa bólimine barǵan áıel burynǵy kúıeýiniń ózin qorlaǵanyn aıtyp, aryz jazǵan. Alaıda bul is materıaly boıynsha sheshim aryz túskennen keıin 8 táýlik ótkende ǵana qabyldanǵan. 

Anyqtalǵan zańbuzýshylyqtar boıynsha polıtsııa departamentine prokýrorlyq qadaǵalaý aktisi engizilip, esepke alý jáne tirkeý tártibin buzýdyń aldyn alý, vedomstvolyq baqylaýdy kúsheıtý sharalaryn júrgizý tapsyryldy. 

Eske salsaq, osyǵan deıin ShQO-da 4 alaıaq ózderin rıeltor retinde tanystyryp, 60 mln teńge paıda kórgeni habarlanǵan.