ShQO-da polıtseıler 80-nen astam kólikten turatyn avtotizbekke jol bastap júrdi
ASTANA. KAZINFORM — Jol qozǵalysy qaýipsizdigin qamtamasyz etý jáne jol-kólik oqıǵalarynyń aldyn alý maqsatynda ShQO PD patrýldik polıtsııa batalony kólik júrgizýshileriniń qaýipsiz qozǵalysyn qamtamasyz etti.
ShQO PD baspasóz qyzmeti habarlaǵandaı, Óskemen — Semeı tasjolynyń 13-shaqyrymynan bastap Abaı oblysynyń ákimshilik shekarasyna deıin 80-nen astam avtokólik polıtsııanyń ilesip júrýimen qozǵaldy.
— Qozǵalys barysynda qyzmetkerler jyldamdyq rejıminiń saqtalýyn qadaǵalap, joldaǵy qaýipsizdik talaptarynyń oryndalýyn qamtamasyz etti. Polıtsııa qyzmetkerleriniń úılesimdi ári kásibı is-qımylynyń nátıjesinde kolonna joldyń kúrdeli ýchaskelerinen eshbir oqys oqıǵasyz ótti, — delingen habarlamada.
Polıtsııa júrgizýshilerdi jol qozǵalysy qaǵıdalaryn qatań saqtaýǵa jáne uıymdastyrylǵan kolonnaǵa ilesip júrý kezinde tártip saqshylarynyń zańdy talaptaryn oryndaýǵa shaqyrady.
Aıta keteıik, ShQO-da tozyǵy jetken elektr jelisi saldarynan turǵyndar jıi jaryqsyz otyratyn bolǵan.
