ShQO-da polıtsııadan qashqan kólik júrgizýshisi esirtki qabyldaǵany anyqtaldy

ÓSKEMEN. QazAqparat – Shyǵys Qazaqstan oblysy Besqaraǵaı aýdanynda esirtki qabyldap kólik tizgindegen er adam ustaldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, tártip saqshylary Qaramyrza aýylynyń mańynda «VAZ-2107» markaly avtokóligin toqtatady. Alaıda júrgizýshi polıtsııa qyzmetkerlerinen qashyp qutylmaq bolǵan. Onyń sońyna túsken polıtseıler kóp uzamaı kóliktiń jolyn bógeıdi.

«Salon ishinde osy aýyldyń 1984 jáne 1982 jylǵy eki turǵyny bolǵan. Medıtsına ortalyǵyna jetkizilgen olardyń kýálandyrý aktisine sáıkes esirtki qabyldaǵany anyqtaldy. Júrgizýshige qatysty QR ÁQBK-niń 608-baby boıynsha ákimshilik hattama toltyryldy», - delingen habarlamada.

Sonymen qatar tekserý barysynda kólikten konobınoıd tuqymdas qoldan jasalǵan ósimdikter tabylyp, tárkilendi. Sot-hımııalyq saraptama nátıjesine sáıkes, bul esirtki zaty bolyp shyqty.

«Arnaıy qurylǵan jedel-tergeý toby kúdiktiniń garajyna tintý júrgizip, ótkir ıisi bar ósimdik tektes zat salynǵan úsh polıetılen paketti tapty. Saraptama qorytyndysyna sáıkes, tárkilengen zattyń marıhýana ekeni anyqtaldy. Atalǵan fakti boıynsha QR QK-niń 300-babymen (Quramynda esirtki zattar bar, ósirýge tyıym salynǵan ósimdikterdi zańsyz egip-ósirý) sotqa deıingi tergeý amaldary júrgizilýde», - delingen aqparatta.