ShQO-da polıtsııa qyzmetkeri áriptesin óltirdi degen kúdikpen qamaýǵa alyndy
ÓSKEMEN. QazAqparat – Shyǵys Qazaqstan oblysy Ulan aýdanynda polıtsııa qyzmetkeri kóz jumyp, kúdikti retinde áriptesi qamaýǵa alyndy, dep habarlaıdy QazAqparat tilshisi.
10 qazan kúni «Almaty-Óskemen» tasjolynyń Ulan aýdanyndaǵy ýchaskesinde qyzmet babynda júrgen polıtseı kóz jumǵan.
ShQO polıtsııa departamenti baspasóz qyzmetiniń málimetinshe, atalǵan fakti boıynsha QR Qylmystyq Kodeksiniń 99-baby 1-bóligine sáıkes sotqa deıingi tergeý amaldary bastaldy.
«Qazirgi ýaqytta tıisti saraptamalar taǵaıyndaldy. Oqıǵanyń mán-jaıy anyqtalyp jatyr. Kúdikti retinde marqummen birge bolǵan 36 jastaǵy áriptesi ustalyp, ızolıatorǵa qamaýǵa alyndy. Sol jerge oblys prokýrory, polıtsııa departamentiniń bastyǵy, ishki qaýipsizdik basqarmasynyń bastyǵy jáne ІІM ákimshilik polıtsııa komıtetiniń ókili bardy. Qylmystyq istiń tergelýi QR Іshki ister mınıstrliginiń erekshe baqylaýyna alynǵan», - delingen aqparatta.
Beıresmı málimetterge súıensek, polıtseıdiń denesi qyzmettik kólikten tabylǵan.
