ShQO-da polıtsııa qyzmetkeri 3 balany órtten qutqardy
ÓSKEMEN. QazAqparat – Shyǵys Qazaqstan oblysy Rıdder qalasynda tártip saqshysy 3 balany órtten qutqaryp qalǵan, dep habarlaıdy QazAqparat tilshisi.
Polıtsııa kapıtany Ivan Nazarov 20 sáýir kúni bolǵan oqıǵanyń egjeı-tegjeıin eshkimge jar salyp aıtpaǵan. Onyń erligi jaıly balalaryn qutqarǵanyna rıza bolǵan ata-analardan belgili boldy.
ShQO Polıtsııa departamenti baspasóz qyzmetiniń málimetinshe, saǵat tańǵy 05:00 shamasynda polıtseı Internatsıonalnyı kóshesindegi jer úılerdiń biriniń aýlasyndaǵy nysanda órt shyqqanyn baıqap qalady. Birden sol jerge júgirip barǵan polıtsııa qyzmetkeriniń aldynan úreılengen áıel atyp shyǵyp, órt shalǵan ǵımaratta kishkene balalarynyń baryn aıtqan. Ivan Nazarov esh oılanbastan otqa oranǵan ǵımaratqa kirip, úsh balany qutqarýǵa umtyldy. Іshi tútinge tolyp, kórý múmkindigi nasharlaǵanyna qaramastan ol uıqyda jatqan balalardy kórpege orap, syrtqa alyp shyqqan.
«Polıtsııa qyzmetkeri batyl ári jyldam qımyldap balalarymyz qutqaryp qaldy. Sondaı-aq ol tilsiz jaýdyń kórshiles úılerge taralýyn toqtatýǵa kómektesti. Biz Ivan Nazarovqa myń da bir alǵysymyzdy aıtamyz», - deıdi Rıdder qalasynyń turǵyny Galına Kolesnıkova.
Qazirgi tańda tártip saqshysy turǵyndarǵa órt kezinde joǵalǵan qujattaryn qalpyna keltirýge kómektesýde.
