ShQO-da polıtsııa beketinen esirtki alyp ótpek bolǵan er adam ustaldy
ÓSKEMEN. QazAqparat – Shyǵys Qazaqstan oblysy Shemonaıha qalasynda statsıonarlyq polıtsııa beketinen ótip bara jatqan er adamnan ıisshil ıttiń kómegimen esirtki tabyldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, «Quqyq tártibi» jedel-aldyn alý sharasyn júrgizý barysynda Shemonaıha shaharyndaǵy «Rýbej» statsıonarlyq polıtsııa beketinde tártip saqshylary «Toıota» avtokóligin toqtatqan. Qyzmettik-izdestirý ıtiniń kómegimen kólik salonyn tekserý kezinde 43 jastaǵy jolaýshynyń jeıdesiniń qaltasynan esirtki tabyldy.
«Ósimdik tektes, ótkir ıisti, qońyr-jasyl tústi zat bar túıinshek tárkilendi. Saraptama qorytyndysyna sáıkes, onyń salmaǵy 3,41 gramm keptirilgen marıhýana ekendigi anyqtaldy. Óskemen qalasynyń turǵyny esirtkini Shemonaıha aýdany Ýst-Talovka kentindegi Úbi ózeniniń jaǵasynan ózi paıdalaný úshin julyp alǵanyn túsindirdi», - delingen habarlamada.
Qazirgi ýaqytta atalǵan fakti boıynsha QR QK-niń 296-baby 2-bóligine sáıkes sotqa deıingi tergeý amaldary bastaldy.
