ShQO-da polıtseıler joǵalǵan 2 balany tapty
ÓSKEMEN. QazAqparat – Shyǵys Qazaqstan oblysy Altaı aýdanynda polıtsııa qyzmetkerleri joǵalǵan 2 balany tapty, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, Altaı qalasynda tártip saqshylary tún kezinde kóshelerdi patrýldeý barysynda ata-anasynyń qaraýynsyz júrgen qarshadaı balalardy tapqan.
«Belgili bolǵandaı, sol kúni otbasy músheleri týystarynyń biriniń úıine qonaqqa barǵan. Sodan qaıtyp bara jatqanda 8 jáne 6 jastaǵy balaqaılar velosıpedpen alǵa ozyp ketken. Alaıda tym alysqa uzaǵan olar adasyp qaldy. Ata-anasyn taba almaı aıqaılap júrgen balalardy polıtsııa qyzmetkerleri baıqap qalǵan», - delingen aqparatta.
Polıtseıler eki oqýshyny áke-sheshesine aman-esen jetkizdi. Óz kezeginde olar saqshylarǵa shynaıy rızashylyqtaryn bildirdi.
