ShQO-da polıtseıdi temirmen soqqyǵa jyqqan er adam 5 jylǵa qamaldy

ÓSKEMEN. QazAqparat – Shyǵys Qazaqstan oblysy Glýbokoe aýdanynda polıtsııa qyzmetkerin temir shybyqpen soqqyǵa jyqqan er adam 5 jylǵa túrmege qamaldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, 30 jastaǵy tártip saqshysy jergilikti turǵynnyń alkogoldy sýsyn ishken-ishpegendigin anyqtaý maqsatynda medıtsınalyq kýálandyrýǵa jetkizbek bolǵan.

«Alaıda ol polıtsııa qyzmetkeriniń zańdy talaptaryn oryndaýdan bas tartty. Onymen qoımaı, temir shybyqpen polıtsııa qyzmetkeriniń ishine soqqy jasap, dene jaraqatyn keltirgen. Polıtseıdiń kásibı is-qımyldarynyń arqasynda er adam ustaldy. Tergeý amaldary aıaqtalǵan soń is sotqa jetti», - delingen aqparatta.

Aýdandyq sottyń úkimimen aıyptalýshy 5 jyl merzimge bas bostandyǵynan aıyryldy.