ShQO-da peshti paıdalaný erejeleriniń buzylýynan 20-dan asa úıde órt shyqty
ÓSKEMEN. KAZINFORM — Shyǵys Qazaqstan oblysynda bıylǵy jylytý maýsymy bastalǵaly beri peshti paıdalaný erejeleriniń buzylýynan 24 úıde órt tutanǵan.
ShQO Tótenshe jaǵdaılar departamentiniń málimetinshe, qutqarýshylar profılaktıkalyq jumystardy kúsheıtip, turǵyndarǵa qaýipsizdik sharalaryn eske salyp jatyr.
— Olar murjalardy únemi tazalap, peshterdiń jaramdylyǵyn tekserýge, olardyń shamadan tys qyzýyna jol bermeýge jáne qaraýsyz qaldyrmaýǵa keńes berýde. Elektr quraldaryn paıdalanǵan kezde jelige shamadan tys júkteme túsirmeý, aqaýly rozetkalar men qoldan jasalǵan jylytqyshtardy paıdalanbaý mańyzdy. Sondaı-aq balalardyń qaýipsizdigine erekshe nazar aýdaryp, olardy jumys istep turǵan jylytý quraldarynyń janynda jalǵyz qaldyrmaý qajet, — delingen aqparatta.
Mamandar túsi men ıisi joq ýly gazdy anyqtaý úshin arnaıy datchıkter ornatýǵa da keńes beredi. Jylytý maýsymy bastalǵaly beri profılaktıkalyq is-sharalar 27 myńnan astam úı men aýlany qamtydy. Oblystyń 70 myń turǵynyna túsindirý jumystary júrgizildi.
— Áleýmettik osal toptaǵy otbasylarǵa erekshe kóńil bólinip otyr. Bıylǵy jylytý maýsymynda esepke alynǵan 2 758 úıdiń barlyǵy ýly gazdy anyqtaıtyn datchıktermen jabdyqtalǵan. Sońǵy bes jylda óńirde osyndaı 17 myńnan astam qurylǵy ornatyldy. Datchıkterdiń ýaqtyly iske qosylýynyń arqasynda 42 adam, onyń ishinde 34 bala qutqaryldy, — delingen habarlamada.
2026 jylǵy 1 qazannan beri óńirdiń turǵyn úı sektorynda 65 órt tirkelgen. Onyń 24-i peshti paıdalaný talaptaryn buzýdan, 19-y otpen abaısyz jumys isteýden, taǵy 15-i elektr jabdyqtaryn montajdaý jáne paıdalaný kezindegi talaptardy saqtamaýdan bolǵan. Órt sanynyń eń kóp ósýi Óskemen qalasynda, Zaısan, Shemonaıha jáne Glýbokoe aýdandarynda baıqaldy.
Eske salsaq, osyǵan deıin Almatydaǵy eń kóne sport oqý oryndarynyń biriniń ǵımaraty órtengeni habarlanǵan.