ShQO-da pesh jaǵyp otyrǵan 11 myńnan astam úıde qaýipsizdik erejeleri saqtalmaǵan

ÓSKEMEN. KAZINFORM – Shyǵys Qazaqstan oblysynda qutqarýshylar jer úılerdi aralap, tekserý júrgizip jatyr. Sonyń barysynda pesh jaǵyp otyrǵan 11 myńnan astam úıde qaýipsizdik erejeleri saqtalmaǵany anyqtaldy.

Qys kezinde jer úılerdegi órt sany arta túsedi. Buǵan birneshe faktor sebep. Atap aıtqanda, peshti durys paıdalanbaý jáne ondaǵy aqaýlar, elektr qurylǵylaryna júktemeniń kóbeıýi, otty abaısyz qoldaný. Qaýip-qaterdi azaıtý úshin ShQO TJD qyzmetkerleri, polıtseıler men eriktiler turaqty túrde reıdterge shyǵýda. Úı ıelerine órt qaýipsizdiginiń erejeleri jiti túsindirilip jatyr.

«Eń áýeli peshtegi jaryqtardyń qanshalyqty qaýipti ekenin jetkizemiz. Jaýapkershiligi joǵary azamattar jazda peshin, tútin murjasyn sylap, áktep, kúıeden tazartady. Saıyp kelgende bul ózińizdiń jáne otbasyńyzdyń qaýipsizdigi úshin jasalady», – dedi departamenttiń memlekettik órt baqylaý basqarmasynyń bastyǵy Nurjan Ómirjanov.

Qutqarýshylar peshti durys paıdalanbaýdyń saldarynan adam ómirine qaýip tónetindigin qatań eskertti. Órt qana emes kózge kórinbeıtin gaz da asa qaterli. Ýlanýdyń alǵashqy belgisi – adamnyń basy qatty aýyryp, tunshyǵa bastaıdy. 

Jylytý maýsymy bastalǵaly beri TJD qyzmetkerleri 90 000-nan astam úıdi aralap shyqty. Áleýmettik osal toptarǵa jatatyn turǵyndardyń úılerine ýly gazdy anyqtaıtyn 550 datchık ornatyldy. 

Reıdter barysynda 26 000-nan astam buzýshylyq anyqtalsa, onyń 11 000-y peshti durys paıdalanbaýǵa qatysty bolyp otyr. Departament mamandarynyń ýaqtyly júrgizgen profılaktıkalyq sharalarynyń arqasynda turǵyndar 22 000-nan astam buzýshylyqty joıdy.

Eske salsaq, osyǵan deıin jylytý maýsymy bastalǵaly elimizde 913 órt tirkelgeni habarlanǵan.