ShQO-da pesh jaǵatyn 7 myńnan astam úıde órt qaýipsizdigi saqtalmaǵan
ShQO tótenshe jaǵdaılar departamenti baspasóz qyzmetiniń málimetine súıensek, jylytý maýsymy bastalǵaly beri óńir qutqarýshylary profılaktıkalyq jumystardy kúsheıtti. Búgingi tańda oblys aýmaǵynda pesh jaǵylatyn 90 113 úı bar.
«Mamandar 67 145 jeke turǵyn úıdi aralap shyqty. Sonyń nátıjesinde, pesh jaǵyp otyrǵan 7 myńnan astam úıde órt qaýipsizdigi talaptary saqtalmaǵany anyqtaldy. Olarǵa eskertý jasalyp, túsindirý jumystary júrgizildi. Peshten shyqqan órt asa qaýipti. Kóp jaǵdaıda ol úıdiń tolyqtaı janyp ketýine ákelip soǵady», - deıdi departament bastyǵynyń orynbasary Serik Amangeldın.
Jyl basynan beri Shyǵys Qazaqstanda 111 ret pesh órtengen. Sońǵy órt 31 qazanda Óskemendegi Kýratov kóshesinde boldy. Jer úı aýlasyndaǵy monshanyń shatyry, aǵash qurylymdary jandy. Tilsiz jaýdyń jalpy aýdany 12 sharshy metrdi quraǵan.