ShQO-da paıdaly qazbalardy zańsyz óndirý deregi boıynsha 1 mlrd teńgeden astam zalal óndirildi
ÓSKEMEN. KAZINFORM — Shyǵys Qazaqstan oblysynda jer qoınaýyn zańsyz paıdalaný faktisine qatysty tergeý aıaqtaldy. Qylmystyq is materıaldary sotqa joldanyp, kúdiktilerdiń zańsyz jolmen tapqan tabysyna satyp alǵan múlki tárkilendi.
Іstiń mán-jaıyn Óńirlik kommýnıkatsııalar qyzmetinde ótken baspasóz konferentsııasynda ShQO boıynsha Ekonomıkalyq tergep-tekserý departamenti Tergeý basqarmasynyń basshysy Qýat Rahymbaev málim etti.
— Tıisti lıtsenzııasyz paıdaly qazbalardy óndirý, tasymaldaý jáne satý deregi boıynsha qylmystyq is sotqa joldandy. Qylmystyq jolmen tabylǵan aqshaǵa satyp alynǵan múlik memleket kirisine tárkilendi. Sonymen qatar 1 mlrd 53 mln teńge kólemindegi zalaldy óteý týraly talap-aryz qanaǵattandyryldy, — dedi ol.
Osy rette, vedomstvo ókilderi Qazaqstanda jer qoınaýyn óz betinshe paıdalaný jáne tıisti ruqsat qujattarynsyz shıkizat saýdalaý aýyr ekonomıkalyq quqyqbuzýshylyqtarǵa jatatynyn eske saldy.
Mundaı áreketter úshin kinálilerdiń múlki tolyq tárkilenip, tabıǵat pen memleket bıýdjetine keltirilgen zalal óndirilip qana qoımaı, bas bostandyǵynan aıyrýǵa deıingi qylmystyq jaza kózdelgen.
Eske salsaq, osyǵan deıin Qazaqstanda qatty paıdaly qazbalarǵa roıaltı engizý 2029 jylǵa shegerilgeni habarlanǵan.