ShQO-da paıdalanylmaı jatqan 2,7 mln gektar jer memleketke qaıtarylmaq
Bul jaıly aımaq basshysy Danıal Ahmetov jer qatynastary jáne aýyl sharýashylyǵy basqarmalarynyń basshylarymen ótken jınalys barysynda aıtty.
«Búginde bos jatqan alqaptardy qoldanysqa jaratý óte mańyzdy. Sebebi kóptegen sharýa qojalyqtary jaıylymdyq jerlerdiń tapshylyǵyn sezinýde. Qazirgi tańda jerdiń bir bóligin burynǵy menshik ıeleri óz erkimen qaıtaryp berdi. Barlyq qalalar men aýdandardyń ákimderine tanystyrylǵan ortaq belgilengen algorıtm bar», - dedi oblys ákimi.
Onyń aıtýynsha, paıdalanylmaı jatqan 2,7 mıllıon gektar jer memleketke qaıtarylýy tıis.
Osy oraıdaǵy jumys Glýbokoe, Aıagóz jáne Zaısan aýdandarynda qarqyndy júrip jatyr.
«Ónimdiligi tómen jáne ósimdik sharýashylyǵy úshin tıimsiz jerlerdi jaıylymǵa berý máselesin qarastyryp jatyrmyz. Sondaı-aq 164 gektar jerdi birqatar eldi mekenderdiń ákimshilik shekarasyna qosý qajet. Qalalar men aýdandardyń ákimderine bir aı ishinde mal jaıylymyna qatysty qıyndyqtardy sheshýdi tapsyrdym», - dedi Danıal Ahmetov.
