ShQO-da paıdalanylmaǵan 117 myń gektardan astam jer memleketke qaıtaryldy

ÓSKEMEN. KAZINFORM – Shyǵys Qazaqstan oblysynda bir jylda paıdalanylmaı bos jatqan 117 myń gektardan astam jer memleketke qaıtaryldy.

ShQO jer qatynastary basqarmasynyń málimetine súıensek, óńir halqyna mal sharýashylyǵymen aınalysý úshin 69,9 myń gektar jaıylymdyq jer qajet. 

- 2024 jyly memleketke paıdalanylmaı bos jatqan 117 myń gektar jer qaıtaryldy. Osynyń nátıjesinde, azamattardyń jaıylymdyq jer qajettiligi tolyqtaı óteldi. 67 myń gektar jer paıdalanýshylardyń óz erkimen bas tartýymen, 35 myń gektar jaldaý merziminiń aıaqtalýymen, 3,3 myń gektar jergilikti atqarýshy organdardyń sheshimderin joıýymen, 2,4 myń gektar jer sot sheshimi arqyly qaıtarylǵan, - deıdi basqarma basshysy Nadejda Mıheılıs.

Onyń aıtýynsha, «Jaıylymdar týraly» QR Zańyna engizilgen ózgeristerge sáıkes, jaıylymdardy basqarý jáne paıdalaný josparlary jergilikti bıýdjet esebinen ázirlenedi.

- Oblystyń geoportaly arqyly jer ýchaskeleriniń kadastrlyq qunyn anyqtaý, ınjenerlik jeliler kartalaryn kórý, atmosferalyq aýanyń jaǵdaıyn onlaın baqylaý, ekologııa jáne qylmys derekterimen jumys isteý múmkindikteri qamtamasyz etilgen. Geoportal ártúrli memlekettik derekter bazalarymen biriktirilgen. Bul jer qorynyń basqarý jumysyn tıimdi etedi, - dep túsindirdi Nadejda Mıheılıs.

Eske salsaq, osyǵan deıin Atyraýda jerdi zańsyz paıdalanǵan sharýa qojalyǵyna 2,5 mln teńge aıyppul salynǵany habarlanǵan.