ShQO-da patrýldik polıtsııa ınsýlt alǵan júrgizýshige kómek kórsetti

ÓSKEMEN. KAZINFORM – 8 qańtarda saǵat 20:00 shamasynda Beloýsovka aýylynyń turǵyny avtokóligimen Óskemenge azyq-túlik alýǵa bara jatyp, oblys ortalyǵyna kire beriste densaýlyǵynyń kúrt nasharlaǵanyn sezgen. 61 jastaǵy júrgizýshi ózin jaısyz sezingendikten, kóligin jol jıegine toqtatýǵa májbúr bolǵan.

Polisia.kz málimetinshe, jol jıeginde turǵan kólik patrýldik polıtsııa batalony ekıpajynyń nazaryn ózine aýdarǵan. Qyzmetke jańadan kirisip, bekitilgen baǵytty tekserip júrgen Aqylbek Bazylbekov pen Ǵazız Shámenov birden kómekke keldi. 

Tekserý barysynda polıtseıler er adamnyń boıynan ınsýlt belgilerin baıqaǵan. Ýaqyt joǵaltpastan, tártip saqshylary shuǵyl sharalar qabyldap, júrgizýshini №1 qalalyq aýrýhanaǵa deıin alyp bardy. Nátıjesinde naýqasqa der kezinde medıtsınalyq kómek kórsetildi.

Polıtsııa azamattardy kólik basqarý kezinde, ásirese qys mezgilinde densaýlyǵyna muqııat bolýǵa shaqyrady. Ózińizdi nashar sezingen jaǵdaıda qozǵalysty dereý toqtatyp, medıtsınalyq kómekke júginý qajet. Qandaı da bir qıyn jaǵdaılarda 102 nómirine habarlasýdyń nemese jaqyn mańdaǵy polıtsııa ekıpajyna júginýdiń mańyzyn eske salady. 

Eske sala keteıik, buǵan deıin byltyr Qazaqstanda 20 qylmystyq toptyń áreketi toqtatylǵanyn jazǵan edik.