ShQO-da patrýldik avtomobıl kólik apatyna ushyrady
NUR-SULTAN. QazAqparat - Shyǵys Qazaqstan oblysynda patrýldik avtomobıl jol-kólik apatyna ushyrady, dep habarlaıdy QazAqparat tilshisi.
Óńirlik polıtsııa departamentiniń baspasóz qyzmeti taratqan aqparatqa qaraǵanda, «102» pýltine Rıdder qalasynda jol-kólik apaty bolǵany týraly habarlama túsken. Mas kúıdegi júrgizýshi júrgizip kele jatqan VAZ-21061 kóligi joldyń qarsy jolaǵyna shyǵyp ketip, patrýldik kólikpen soqtyǵysqan.
«Polıtsııa qyzmetkerleri kólikterdiń betpe-bet soǵysýyna jol bermeý úshin ońǵa qaraı rýldi burǵan. Sol kezde kóliktiń artqy dóńgelegi tusynan soqqy bolyp, qyzmettik kólik aýdarylyp qalǵan. Kólik quraly búlingenimen qyzmetkerler zardap shekken joq», - dep atap ótedi vedomstvodan.
Al jol apatyna kináli 42 jastaǵy júrgizýshi Rıdder qalasynyń ýaqytsha oqshaýlaǵyshyna 20 táýlikke qamaldy.
