ShQO-da páterde órt shyǵyp, 1 adam kóz jumdy
ÓSKEMEN. QazAqparat – Shyǵys Qazaqstan oblysy Glýbokoe aýdanynda páterde órt shyǵyp, 1 adam kóz jumdy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, Nagornaıa kóshesindegi kópqabatty turǵyn úıdiń ekinshi qabatyndaǵy páter órtengen. Tilsiz jaý jeke zattar men tósekti sharpydy.
Oqıǵa ornyna órt sóndirýshiler shuǵyl kelip jetti. Olar birinshi kezekte podezden 3 adamdy evakýatsııalady. Sodan keıin tútin tumshalaǵan kórshi páterden 14 jastaǵy qyz qutqarylǵan.
«Órt shyqqan páterden 1972 jylǵy er adamnyń máıiti tabyldy. Kóp uzamaı 2 sharshy metrge jaıylǵan jalyn aýyzdyqtaldy. Órttiń shyǵýyna – mas kúıde temeki shegý kezindegi abaısyzdyq sebep bolýy múmkin», - delingen aqparatta.
