ShQO-da páter tonady degen kúdikpen eki azamat ustaldy
ASTANA. 6 naýryz. QazAqparat - Shyǵys Qazaqstan oblysynyń polıtsııa qyzmetkerleri Glýbokoe aýdanynda turatyn jeke kásipkerdiń páterine jasalǵan qaraqshylyq shabýyl qylmysyn áshkereledi.
Bul týraly búgin ótken aptalyq brıfıngte QR ІІM resmı ókili Nurdildá Oraz málim etti.
Resmı ókildiń aıtýynsha, aqpan aıynyń sońynda, saǵat tańǵy 7-niń shamasynda 35 jastaǵy jábirlenýshi áıel polıtsııaǵa habarlasyp, óziniń tún ortasynda ashylǵan balkon esiginiń syqyrynan oıanyp, tórgi bólmege óte bere qarańǵyda er adamdy kórgendigin jáne álgi adamnyń ony temir zatpen urǵandyǵyn aıtty.
«Jábirlenýshi aıqaılap, kireberiske qashyp shyǵady da, kórshilerin kómekke shaqyrady. Kórshi turatyn sińlisin ertip páterge qaıtyp oralǵanda ol ózine tıesili 200 myń teńge jáne qujattary salynǵan sómkeniń urlanǵandyǵyn baıqaǵan», - deıdi N. Oraz.
Jedel izdestirý sharalary barysynda osy qylmysqa qatysy bar degen kúdikpen Glýbokoe aýdanynyń eki turǵyny quryqtaldy. Qazirgi tańda olardyń osy tektes ashylmaǵan qylmystarǵa qatystylyǵy tekserilip jatyr.
