ShQO-da páter terezesinen oq atyp, adamdardy jaralaǵan burynǵy polıtseı sottaldy
ÓSKEMEN. QazAqparat – Shyǵys Qazaqstan oblysy Rıdder qalasynda páter terezesinen oq atyp, adamdardy jaralaǵan burynǵy polıtseı sottaldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, Rıdderde mas er adam qolyna pnevmatıkalyq atys qarýyn alyp páteriniń terezesinen kóshedegi adamdarǵa oq atqan.
Ol eki azamatty jaralady. Er adamdy jedel kelip jetken tártip saqshylary toqtatty. Belgili bolǵandaı, shahar turǵyny buryn polıtsııa qyzmetkeri bolǵan.
«Qalalyq ákimshilik sottyń sheshimimen azamat QR ÁQBtK-niń 434-baby 1-bóligimen «Usaq buzaqylyq» boıynsha ákimshilik jaýapqa tartyldy. Sot jábirlenýshilerdiń aýyr jaraqat almaǵanyn, aıyptalýshynyń osyǵan deıin sotqa tartylmaǵanyn eskerdi. Ol 15 900 teńge aıyppul tóleıdi. Er adamnan pnevmatıkalyq myltyq tárkilendi», - delingen aqparatta.
